In limyèr sou la tol’ Zion.

Littérature

” Par dé fwa, mi té démann a mwin, koman tout’ sak la, la pi espacé.
Mi ar mazin, dann tan momon té pass ankor la kaz, dann tan mi navé ankor la zwa. Gayar souvényr, gayar sa. Le zafèr, mi konétra pa koman di a li… Mé le zafèr y ginye fé tramn mo kèr kom sa la. Té gayar wi, té gadiamb.”

Zistwar mi sva kont a zot la, cé le zistwar in marmail la parti in zour é li la pi rent sa kaz. Zot tout’ la fin konèt in zistwar koma, zot tout’. Pask si ti gard byin, nout zoli ti zil lé kom la zol nout rasyn, la zol sak lé pli for ké nou, sak zot y apèl Zion.

La vie d’Emile.

Assiz si lo robor la fénèt, li té gard lo sièl. Dann fénwar, li té rod zétwal.

– Agard ! Sal la lé zoli ! y bry byin ! li krian pli fort ankor kin zèn kok y vyin lèvé, kom si pou li, té d’bonèr.

– Ferm out bouss ! spèss ti grèn ! Momon sa kounish a nou ! en bèzan in clak si lo zépol lo ti marmay.

– AAYYE ! Nénèeeene ! Y fé mal !

– Bin ou navé ka pa fé brui !

Le ti fi, té dwa awar dé ou trwa zané dpliss ké son ti frèr. Li té lé in zoly ti kafrine, lo sové byin touffé. Sèk ! parey la pay kann’ ! Taka son ti zié koulèr la lyn’ té klèr parey do lo. Dann zot samb, navé papié zournal kolé dsi lo mir. Kom in zoli zafèr, in lix po sak navé pwin. Dayèr navé pwin d’li, navé pwin d’larmwar, navé pwin d’kouran. Zist, in pé la pay atèr ek in bout la twal pangar si fé fré da nuite. La nuite kom toultan, navé pwin brui, té gayar, té ropoz bompé.
Pa kom zordu ek tout’ le ta loto y pass koté la kaz en longuèr zourné, ziska solèy y lèv. Dann tan lontan gramoun la touzour di, sirtou dann mwa novamb, sort’ pa aprè sizèr. Pangar lo diab va ni war a twé ! In nafèr kom sa a pé pré.
Dann in lèr sizèr, Momon té di marmail tak la port’ é rèt ann’ dan ! Li navé tèt rézon.

  1. Zourné la rivièr
    Gran matin té sava rod do lo, koup do bwa é lav linz. Le momon la fé lèv bana, le ti fi pou saroye do bwa, le ti Emile pou trap do lo. Tanka li, gramoune li té, li té ar okip lav linz ankor. Té lèv bonèr zot ! Pa pou fatigue mwin lo kor, non, mé pasq té abitué. Bann zancèt banna té bann kiltivatèr, bann zesclav, bann créole, yab ek malgas.
    Emile té yèm byin fé travay la kaz, té okip so zourné. Mé sak li té préfèr té kan son momon té larg a li in pé pou ginye marronne in pé dann bwa pou konèt bann santié, tou sa la. Bin, té yèm sa li. Son gran sèr té pli souvan dann la bitation, té plant’ patate, manioc, géranium ek flèr pou vend’ samédi ek dimans koté le ti cloché légliz. Sakèn navé so l’okipasyon, so travay. Mé tout’ té kontan, té pass kom sa la.

    [Prochainement : la suite] …